ຂ່າວລາຍວັນ

ອົງການ FAO ມອບອຸປະກອນ ແລະ ເຄື່ອງ ໃຊ້ທີ່ຈຳເປັນ ແກ່ລາວ ເພື່ອຕອບໂຕ້ໂຄວິດ ມູນຄ່າ 370 ລ້ານກີບ

ອົງການ FAO ມອບອຸປະກອນ ແລະ ເຄື່ອງ
ໃຊ້ທີ່ຈຳເປັນ ແກ່ລາວ ເພື່ອຕອບໂຕ້ໂຄວິດ


ຂປລ. ອົງການອາຫານ ແລະ ການກະເສດ ຂອງສະຫະປະຊາຊາດ (UN FAO) ໄດ້ມອບອຸປະກອນ ແລະ ເຄື່ອງໃຊ້ທີ່ຈຳເປັນ ເພື່ອຕອບໂຕ້ພະຍາດໂຄວິດ-19 ມູນຄ່າ ປະມານ 370 ລ້ານກີບ (37.810 ໂດລາສະຫະລັດ) ປະກອບມີ ຕູ້ເກັບຕົວຢ່າງ, ຊຸດນໍ້າຢາ ແລະ ເຄື່ອງໃຊ້ເພື່ອກວດຫາພະຍາດໂຄວິດ-19 ໃຫ້ແກ່ສູນວິເຄາະ ແລະ ລະບາດວິທະຍາ ຂອງກົມຄວບຄຸມພະຍາດຕິດຕໍ່, ກະ ຊວງສາທາລະນະສຸກ ແລະ ໂຮງໝໍ ຫລື ແຂວງຕາມຄວາມຕ້ອງການ.

ພິທີມອບ-ຮັບເຄື່ອງໃນຄັ້ງນີ້, ໄດ້ຈັດຂຶ້ນໃນວັນທີ 12 ກໍລະກົດ 2012 ທີ່ນະຄອນຫລວງວຽງຈັນ, ຕາງໜ້າມອບໂດຍ ທ່ານ ນາຊາ ຮາຢັດ ຜູ້ຕາງໜ້າຂອງອົງການ FAO ປະຈຳ ສປປ ລາວ ແລະ ຕາງໜ້າຮັບໂດຍ ທ່ານ ດຣ. ບຸນແຝງ ພູມມະໄລສິດ ລັດຖະມົນຕີ ກະຊວງ ສາທາລະນະສຸກ ພ້ອມດ້ວຍພະນັກງານທັງສອງຝ່າຍເຂົ້າຮ່ວມ.

ທ່ານ ນາຊາ ຮາຢັດ ໄດ້ກ່າວວ່າ: ການສະໜອງອຸປະກອນ ແລະ ເຄື່ອງໃຊ້ທີ່ຈຳເປັນດັ່ງກ່າວ,ເພື່ອສະແດງໃຫ້ເຫັນເຖິງວຽກທີ່ສຳຄັນ ທີ່ອົງການ FAO ກຳລັງຈັດຕັ້ງປະຕິບັດຢູ່, ເຊິ່ງເປັນສ່ວນໜຶ່ງຂອງແຜນງານຕອບໂຕ້ດ້ານມະນຸດສະທຳ ຂອງສະຫະປະຊາຊາດ.

ແຜນງານນີ້ມີເປົ້າໝາຍ ເພື່ອສະໜັບສະໜູນລັດຖະບານບັນດາປະເທດສະມາຊິກ ເພື່ອໂຕ້ຕອບການລະບາດຂອງພະຍາດ ໂຄວິດ-19. ພວກເຮົາໄດ້ເພີ່ມຄວາມພະຍາຍາມ ໃນການຊ່ວຍເຫລືອບັນດາປະເທດຕ່າງໆ ນອກເໜືອຈາກໜ້າທີ່ ໃນການປັບປຸງໂພຊະນາການ, ເພີ່ມພູນປະສິດທິພາບຜົນຜະລິດທາງດ້ານກະສິກຳ, ຍົກລະດັບມາດຕະ ຖານຊີວິດການເປັນຢູ່ ຂອງປະຊາຊົນໃນຊົນນະບົດ ແລະ ການປະກອບສ່ວນໃນການເຕີບໂຕຂອງເສດຖະກິດໃນທົ່ວໂລກ.

ໃນໄລຍະຜ່ານມາ, ອົງການ FAO ໄດ້ສະໜັບສະໜູນທາງດ້ານວິຊາການ ໃຫ້ແກ່ລັດຖະບານແຫ່ງ ສປປ ລາວ ເພື່ອຫລຸດຜ່ອນຜົນກະທົບຈາກໂຄວິດ-19 ໂດຍສະເພາະແມ່ນຄວາມໝັ້ນຄົງດ້ານສະບຽງອາຫານ ແລະ ຊີວິດການເປັນຢູ່. ນອກຈາກນີ້, ຍັງໄດ້ສະໜັບສະໜູນຊ່ຽວ ຊານທາງດ້ານວິຊາການ ໃນຂະແໜງສຸຂະພາບສັດ ໃນການສືບສວນ, ການວິເຄາະພະຍາດ ແລະ ການຕິດຕາມບັນດາກໍລະນີ ໂຄວິດ-19 ເພື່ອຫລຸດຜ່ອນຄວາມສ່ຽງຂອງການຕິດເຊື້ອໂຄວິດ-19 ໃນສັດ ແລະ ຄວາມເປັນໄປໄດ້ການແຜ່ລະບາດ ຂອງໄວຣັດຕໍ່ໄປ.

ທ່ານ ນາຊາ ຮາຢັດ ກ່າວຕື່ມວ່າ: ສຳລັບວຽກງານປ້ອງກັນຊາຍແດນ, ອົງການ FAO ໂດຍໄດ້ຮັບການສະໜັບສະໜູນຈາກ ອົງການ USAID ໄດ້ຈັດຝຶກອົບຮົມໃຫ້ເຈົ້າໜ້າທີ່ປະຈຳດ່ານຊາຍແດນ ຢູ່ບັນດາແຂວງພາກເໜືອ, ພາກກາງ, ແລະ ພາກໃຕ້ ໃນການການເຝົ້າລະວັງ, ການຄົ້ນຫາພະຍາດ, ການເກັບຕົວຢ່າງ, ການປ້ອງກັນ, ຄວບຄຸມ ແລະ ການປະຕິບັດອະນາໄມຂ້າເຊື້ອພະຍາດ ໂຄວິດ,

ຈັດກອງປະຊຸມຖອດຖອນບົດຮຽນ ແລກປ່ຽນປະສົບການກ່ຽວກັບການປ້ອງກັນ ແລະ ໂຕ້ຕອບພະຍາດໂຄວິດ-19 ລະຫວ່າງພະນັກງານສາທາລະນະສຸກ, ສັດຕະວະແພດ ແລະ ຕຳຫລວດກວດຄົນເຂົ້າ-ອອກເມືອງ ປະຈໍາດ່ານສາກົນ. ນອກຈາກນີ້, ອົງການ FAO ຍັງໄດ້ໃຫ້ການສະໜັບສະໜູນ ການຢັ້ງຢືນ ແລະ ກວດສອບຄວາມຖືກຕ້ອງ ຂອງຕູ້ຄວາມປອດໄພ ທາງດ້ານຊີວະວິທະຍາ ໃນ ສປປ ລາວນຳອີກ.
ຂ່າວ: ມະນີທອນ, ຂໍ້ມູນ: ອົງການ FAO
ຮູບ: 585

Related Articles

Leave a Reply

Your email address will not be published. Required fields are marked *

Back to top button